Pardear layak do Jahowa!

Sibasaon untuk Ambilan pakon Barita

Tanggal 18 April 2010

Goran minggu             : Misericordias Domini (Idop ni uhur ni Jahowa do manggoki tanoh on)

Teks                             : Tangis-tangis 3: 22-26

Pardear layak do Jahowa!

Kuria ni Tuhan na hinaholonhan! Mangihutkon Tradisi, Buku Tangis-tangis on I surathon Nabi Jeremia bani tahun 587 SM sanggah iidahni parsedani huta Jerusalem. Secara dramatis, Nabi Jeremia on mangidah timus roh hun tiap-tiap bangunan na maseda I Jerusalem. Parinangon na tangis-tangis mangidah niombahni na matei. Soridadu mardalan, mamareksa Jerusalem janah manutungi ganup na tading I kota ai.

Bani halak Jahudi [dihut ma ai bani Nabi Jeremia], kota Jerusalem aima kota na pansing, ianannni Naibata, pusat keagamaan [spiritual], simbol harga diri, kebanggaan ni sidea na gabe bangsa ni Naibata. Sonari, songon na sompong haganupan ai magou, bois lang martikas. Mangidah ai haganupan,  ise ma na lang marpusok ni uhur? On ma latarbelakang ni buku tangis-tangis on na isuratkon secara sastrawi gabe doding na lungun, sepi,  sedih, gok ibagas paruntolon sonai homa kemarahan na lang tarpadas. Sahali nari, on ma tene, pangkorhon ni dousa ni Israel na mambahen Tuhan manguhum sidea.

Hita ganupan na hinarga ni Tuhan Jahowa! Humbani karya sastra on taridah ma pandangan Teologis. Naibata na halani dousa mandaoh, sonari boi idohori use, ibagas tonggo hasasapan ni dousa age pe bani panorang ai, Naibata sanggah manggila janah I pasipni bangsa ai bani sitarononni.

Perikop ni Ambilanta on bani (tangis-tangis 3:1-66) aima renungan pribadini Nabi Jeremia: ahu ma sada halak na dihut mangahapkon na maborit marhitei pukul-pukul ni ringisNi (3:1). Boi ibayangkon hita, sonaha ma kondisi psikologisni Nabi Jeremia, halani ia pe secara pribadi dihut do mangahpkon sitaronon ai. Tontu lang boi tarturi-turihon aha na iahapkonni.

Tapi age sonai, panurat buku on totap do manisipkon  Naiabata aima pardear layak, ibagas buei sitaronon ai. Idop ni uhur ni Jahowa do na so ra marpunsa, seng marnarotap holong ni ateiNi, mulak ratah do ai siap sogod, banggal do habonaronMu. Jahowa do rupeihu, nini tonduyhu, halani ai bani do ahu marpangarapan  (22-24). Nabi Jeremia on pe mangidah bahasa I pudini ganup sitaoronon adong do hal na positif: mase marungut-ungut jolma na manggoluh in? dompak dousani ma ia marungut-ungut. Uji janah pareksa hita ma parlahouta, mulak ma hita bani Jahowa (39-40).

Bapa, inang sonai homa na maposo! Sintong do bahasa sonari, bangsa ai ibagas sitaronon/hamarsikon. Ise pe na manggoluh bani panorang ai pasti boi mangapkon situasi pusok ni uhur. Tapi, mangihutkon ambilan on, suasana pusok ni uhur ai maningon iidah bagas. Lang jut bani na masa ai tumang. Adong do na totap ijon, aima: Naibata paridop ni uhur banggal. Taridah do ai marhitei tonggo ni Nabi on bahasa Naibata manangihon, lang sip songon ungut-ungut ni buei halak. Ambahni ai, porlu do hape pareksaon, mase roh paruntolon ai? Ai do ase porlu tumang nini ambilan on mangkoreksi parlahou I lobei ni Jahowa.

Anggo I tulimati hita bani fasal-fasal ipudini teks on, sonari boi ma idahonta solusi/jalan keluar na pasonangkon. Teks on lang be mansahapkon sitaronon pitah. Tapi mulai ma ipataridahkon jalan keluar na misterius, halani lang adong jolma na boi mangarusi Naibata. Jeremia mangidah secara obyektif na parlobei: sitaronon na idompakkon bangsa Israel aima halani factor sebab-akibat, halani dousa pakon panlanggaron ni sidea. Halani ai, uhuman on iarusima ai gabe pembelajaran na dear pasal hubungan Naibata pakon bangsaNi. Na paduahon aima: Naibata totap do paridop ni uhur. Halani ai, jalan keluarni aima rup mamareksa parlahou janah mulak bani Jahowa (40).

Hita ganupan na hinaholongan! Isobut do bahasa: Pardear Layak do Jahowa (25). Kalimat on aima ungkapan ni iman/haporsayaon. Mahol do kalimat on iluarhon apalgi sanggah ibagas sitaronon banggal. Boi do kalimat on gabe paradoks/bertentangan. Sonaha do sobutan Tuhan in pardear layak hape sanggah hona uhum atap ibagas pusok ni uhur sidea. Pardear layak gati ipahami anggo dear goluh siganup ari, dear suan-suanan, dear horjani tangan, dear parumahtanggaon, dear pargoluhanni kuria, atap singkatni ganup na positif janah gabe hauntungan, boi sobutan pardear layak do Jahowa! Tapi lang sonai urah hape mangarusi na masa on. Apostel Paulus bani Rom 5:3-4 mangkatahon: tapi seng pitah ai, megah do homa hita ibagas hamarsikon, ai ibotoh hita, ihorhon hamarsikon ai do hasabaron; hasabaron ai mangkorhon hatalupon, anjaha hatalupon ai mangkorhon pangarapan. Adong do hape sisi na legan na gati tarlupahon sanggah ibagas hamarsikon hita,

Kalimat: Pardear layak do Jahowa! Pitah boi iidah hita bani na martenger ni uhur Bani. Martenger ni uhur Bani boi do ai iarusi ibagas haporsayaon bahasa ganupan na masa ia, ibagas rancangan ni Naibata, janah jalan keluarni pe pasti do homa domma irancang Tuhan in sandiri.

Halani ai, bani ayat 26 isobut dearan sipsip marpangarapan bani hatuahon na humbani Jahowa, marimbang marungut-ungut atap mangindahi dalan keluar marhitei gogoh sandiri. Bani ujungni, ibagas buei sitaronon ai, maningon mulak do hita hubani Jahowa.

Hita ganupan na hinarga ni Tuhan Jesus Kristus! Goran ni minggutta aima Misericordias Domini (idop ni uhurni Jahowa do na manggoki tanoh on). Age pe sanggah ibagas buei paruntolon/hamarsikon hita I tanoh on, buei do idop ni uhurni Jahowa. Ambilan on mangajarhon banta, bahasa ipudini buei hamarsikon ai, sai ganjang do tanganni Jahowa laho mangurupi. Sai buei do dalan na lang tararusi hita ibagas hajolmaonta, na bani panorangni I pataridahkon Jahowa banta. Hubanta na ibagas hamarsikon sonai homa paruntolon, ipangindo ambilan on do ase sabar janah roh ma hita hu Bani ibagas tonggo, janah jumpah do panorangni marsurak-surak hita ibagas gok malas ni uhur halani itangar, itangihon Jahowa do ganup na tonggo ni halak na martenger ni uhur Bani, halani sahali nari: pardear layak do Jahowa! Amen.

Jogjakarta, 10 Maret 2010

 Binaturni: Pdt.Posma Purba.