Hatahononta ma Diatei Tupa bani Tuhan!

Minggu 18 April 2010. Misericordias Domini

Ambilan                      : Lukas 17:11-19

Jogjakarta, 10 Maret 2010

Binaturni: Pdt.Posma Purba.

Hatahononta ma Diatei Tupa bani Tuhan!

1.      Salah sada horja ni Tuhan Jesus na menarik perhatian  aima: tanda halongangan atap mujizat. Ra anggo ibahen sungkun-sungkun banta, ija do rosuhan hita manangar ambilan atap mangidah tanda halongangan? Bueinan ma ran a mamilih tanda halongangan. Mase? Halani tanda halongangan ai mambahen hita longang, heran, takjub. Padahal, parrohni Tuhan Jesus lang pitah mambahen halongangan atap mujizat tumang, tapi mamboan missi haluahon marhitei ganup horjaNi. Tanda halongangan aima salah sada media/cara/hitei na ibahen Tuhan Jesus laho patorangkon maksud-maksud Surgawi pasal haluahon ai. Janah bani ganup tanda halongangan, dong bei do maknani. Lang pitah makna harafiah tumang.

2.      Bani ambilanta on, Tuhan Jesus pamalumhon sapuluh halak na gadamon/kusta, I parbalogan ni Samaria ampa Galilea. Bani jaman Tuhan Jesus, halak na gadamon ikucilhon/iasingkon hun tongah-tongahni Masyarakat. Naborit gadam/kusta sonari itanda halak goranni lepra marhitei tanda borok pakon kelumpuhan lang dos ai pakon panahit gadam atap Kusta bani Bibelta. Halak na gadamon bani Bibelta menderita bintil-bintil siratah kehijau-hijauan pakon sigerger/ merah (lih.3 Musa 13:49). Penyakit gadam on ianggap menular, halani ai do ase halak na gadamon I kucilhon hun tongah ni masyarakat. Anggo malum pe halak na gadamon, maningon do bahenon upacara pangurasion/pentahiran bani (3 Musa 14:2-20; Luk ). Secara umum boi do hatahonon gadam atap na gadamon aima aib I tongah-tongah ni masyarakat.

3.      Adong do dua pahara na sihol patugahonni ambilan on banta, marhitei na ipamalum Tuhan Jesus sapuluh halak na gadamon.

Naparlobei. Kondisi ni sapuluh halak na gadamon pakon sikap ni sidea dobhonsi manjalo hamalumon. Pasal halak na gadamon sasintongni domma ipatangkas Tuhan Jesus bani Luk.5:12-16. Nai pe, idah hita lobei sitausi latarbelakang konteksni ambilan. Dobhonsi ibontas Tuhan Jesus parbalogan ni Samaria ampa Galilea, sanggah na masuk ia hu bagas sada huta, jumpahsi ma sapuluh halak na gadamon (ay.11-12). na sapuluh halak on berlatarbelakang na berbeda, dong ma ai halak Galilea (Jahudi) sonai homa halak Samaria. Sasintongni dua kelompok on lang boi domu. Halak Jahudi manganggap bahasa halak Samaria aima bangsa na lang patut I parhasoman, halani lang marugama Jahudi (dobni gabe kelompok minoritas na tertindas do sidea).

Tapi, bani konteks naborit gadam on, rukun janah sada do sidea. Justru, gadam ai manrahut hasadaon ni sidea. Mase? Halani dos sitarononni aima: sitaronon halani naborit pakon sitaronon psikologis (ikucilhon) na mambahen sidea gabe kelompok sapangahapan. Anggo domma dos sitaronon/pergumulan, lang adong be hape batasan kelas, status sosial pnl.  Na terjadi aima, muncul saling ketergantungan sada pakon na legan, halani lang mungkin mangarapkon bantuan atap kontak pakon halak na legan, na lang gadamon (basa Imamat 13:45-46).

Kelompok na sapuluh halak on, jongjong mandaoh-daoh janah mandilo Tuhan Jesus.,”Jesus, Guru, idop ma uhur-Mu bannami!”. Mangihutkon dilo-diloni sidea, tontu domma das bani panangarni sidea pasal Tuhan Jesus na boi mambahen tanda halongangan (ay.13).

I tangar Tuhan Jesus do dilo-dilo atap pangindoan ni sidea, janah ibotoh Tuhan Jesus do aha na porlu bani na sapuluh halak on. Ijon Tuhan Jesus pitah mambere parentah, songon na ongga ibahen Elisa hubani Naaman (lih.2Raj 5:10-12). Isini parentah Tuhan Jesus aima: ase laho sidea patuduhkon diri ni sidea bani malim. Agak berbeda do pakon cara ni Tuhan Jesus sanggah pamalumhon na gadamon bani Luk.5:13…ijai Tuhan Jesus manurdukkon tangan janah manjamah halak na gadamon.  mase ma lang songon ai ibahen Tuhan Jesus bani na sapuluh halak on? Anggo tulimat ipardiatei hita, songan parsuruh ni Elisa bani Naaman, ijon ipangindo haporsayaonni sidea bani parentah ai. Mase? Halani lang adong terjadi proses panambarion songon sipanambari na somal, lang adong kontak phisik antara Tuhan Jesus pakon sidea.

Jadi, ujian pasal keyakinan pakon haporsayaon do ijon. Sidea iparentahkon patuduhkon diri hubani malim, na menilai ai na domma malum atap lang do sidea (Im. 14:2). Respon ni sidea aima: taat do sidea bani parentah ai, laho do sidea padahal lape malum sidea. Hamalumon ai terjadi justru sanggah ra sidea mangihutkon parentah ai, padahal lape malum sidea, ijai ma halongangan marhitei hamalumon terjadi. Aha poin na boi ibuat hita ijon? Ketaatan dan kepercayaan.

Dobhonsi manjalo hamalumon na sapuluh halak on, sada do hansa na mulak manjumpahkon Tuhan Jesus lanjar mamuji Tuhan Naibata. Sikap ni sahalak on jelas patuduhkon bahasa ibotohni do martarimakasih. Ibotohni do homa huja ia martarimakasih. Manrogop do ia I lobei ni Tuhan Jesus patuduhkon hatarimakasihonni. Na siah halak nari, tontu patut ma sipareksaon hadirionni bei. Lang binotoh be hata aha ma na talup sobuton bani na siah halak on. Na pasti lang sitiruon sifat na sisonai ai tene. Kenyataanni halak na mulak martarimakasih ai, justru halak Samaria (ay.16,18). Padahal halak Samaria aima komunitas na ikucilhon, ianggap lang maretika, maraturan, bangsa na lang terdidik pnl. Mangihutkon teks on, tambah ma palajaran banta bahasa maningon do botohonta mangkatahon tarimakasih bani Tuhan in halani idop ni uhurNi na banggal ai. Kesombongon sosial gati mambahen golap panonggorta laho mananda Tuhan in.

Napaduahon. Kondisi ni masyarakat/jolma mangidah halak na gadamon.

Agakni, parjumpahan Tuhan Jesus pakon 10 halak na gadamon on lang pitah laho patugahkon hamalumon bani sidea na sapuluh, tapi dihut laho pamalumhon sikap pakon prilaku na lang adil na gati terjadi I tongahni masyarakat. Halak na gadamon on sasintongni domma manaron na parngit pangkorhonni naborit, halani ai ulang be namin itambahi marhitei parlahou atap sikap ta na mamparlahouhon sidea lang be songon jolma atap hasoman. Bani Luk.5: 12-16, Tuhan Jesus pamalumhon sada halak na gadamon. dong hal na menarik na boi idahonta sanggah Tuhan Jesus pamalumhon…jadi isurdukkon Jesus ma tangan-Ni, ijamah ma ia, anjaha nini ma,”Ra do Ahu, borsih ma ho! Jadi mintor magou ma gadam ai hun bani”(Luk.5:13).

4.      Tuhan Jesus manjamah! Manjamah halak na gadamon ai. Aha na ilahoi Tuhan Jesus gabe hal na sulit do ai bani halak na mabuei, halani gadam/kusta ai. Anggo itulimati hita pangkei, pamalumhon aima horja hanabionni Tuhan Jesus. Boi do sasintongni Ia pamalumhon marhitei: hata – sahap tumang, tanpa maningon manjamahsi. Ise do sasintongni na sihol ipamalum Tuhan Jesus ijon sobali halak na gadamon ai? Tontu na roh, na mangidah, sonai homa na mambasa kisah on na lape malum persepsini-sikapni-parlahouni mangidah halak na legan.

5.      Halani ai, mangihutkon ambilan on, ipatugah do banta bahasa goluhta nantuari, sonari pakon patar aima pitah mangarapkon idop ni uhur ni Tuhan in. Adong ketergantungan na total dompak Naibata. Mangajamkon Tuhan bani ganup pargoluhon bani ujungni jumpahan gogoh na mardapot-dapot sonai homa pasu-pasu na laingan. Ambilan on pe paingatkon hita, ase ulang sanggah ibagas hamarsikon, sitoronon tumang dilo-dilo bani Tuhan, sanggah jumpahan pasu-pasu pe, Tuhan ma lobei idilo hita ase marguna pasu-pasu ai tene.si Job mangkataho na matobu pakon na mapaet na humbani Jahowa jaloonta do, ase ulang mardosa hita (Job 2:10). Halani ai, hatahononta ma diatei tupa bani Tuhan Jahowa halani Idop ni uhur ni Jahowa do manggoki tanoh on. Amen.